اسفه ع التاخير

مساء الخير هالمره بـلاش آسـفه علـى التأخيـر
مـدام الـرد بعيونـك دمــوع فـكـل تأخـيـره

ثقل دم العذر ، والا كسـح وجـه الخطـا تبريـر
مدامك عارفـه طبعـي . أجـل وشولـه الحيـره

ترى ماجيت لجل اسمع سواليفـك عـن التقصيـر
أعرف ان الخطا منـي (بـلاش نعيـد هالسيـره)

انـا وانتـي بهالدنيـا تحملنـا بعضـنـا كثـيـر
تعوّدتي على عنـادي ، وصـرت آحـب هالغيـره

انا وانتي حكايتنا مثـل : صـدر السمـا و الطيـر
كثيـر اللـي يطالعهـا ،، ولحـدٍ طالهـا غـيـره

انا وانتي حكايتنا .. مثـل لعبـه ، وطفـل صغيـر
مـع انـه دوم يهملهـا رفـض يسمحبهـا لغيـره

انا وانتي .. وش اوصفلك ؟ عجز عن وصفنا تعبير!
مثل ! مدري ! مثل وشو ! ولكن صعـب تصويـره

انا وانتي بـلاش انتـي أنـا لـو بفقـدك شيصيـر
ومجـرد طـاري الفرقـا علـي ياصعـب تأثيـره

أحبك ؟ ايـه أحبـك .. ذي بعـد يبغالهـا تفكيـر
يخلـف الله علـى عقـلٍ ملكتـي كــل تفكـيـره

تعالي .. نحترم ( شيبة غلانا ) .. لعنبو التصوير!!
تعالـي نغتنـم فرصـة لقانـا دامهـا قصيـيـره

ومساء اللي تبي ، حاضر ولاتزعل ( صباح الخير )
أنا كـل يـوم بتأخـر .. اذا فـي دمعتـك خيـره